暫時香港已經出版既「2008年香港地圖」，我所知有三本，以推出時間計，萬里既《2008香港大地圖》響大約六月尾出，之後八月尾分別有四海文化既《2008香港終極地圖》同埋壹出版既《2008地圖王》。通用一向都係十二月先出，而萬里既《2008香港街道圖》暫時仲未見，唔知齡記會唔會出。



我仲以為2008年第一本地圖會係地圖王，冇諗過萬里今年會咁快手出左本《2008香港大地圖》。顧名思義, 呢本「大」地圖係A4 size,即係普通地圖兩倍大，同通用果本駕駛指南/詳圖咁上下大，佢每一頁下方都預留左空間寫野，介紹該區歷史，最神奇係我見到有兩頁 (好似係元朗果兩頁) 係介紹九號幹線歷史。
隨手揭左一陣睇下點樣「2008」法，結果發現一如佢之前系列咁唔係好掂，2007年應該有既野佢都冇落齊，例如都會 馬尺 商場去彩明商場條行人天橋冇畫到 (反而都會 馬尺 對出塊地未起野佢有寫會做乜) 、后海灣幹線去元朗公路果個交匯處冇畫到 (佢只有畫后海灣幹線) 、屯門公路落荃灣果段D 路畫得唔清楚 (但佢有畫到今年通車既象鼻山路段)、八號幹線去大埔公路 (好似叫T4) 又係畫得唔清楚 (呢個我唔怪佢，因為我響CEDD網站見到既圖都係畫得唔清楚既)，反而天水圍佢D 料好齊，連興建中103 區同104 區既房署屋村都有，甚至屋村名同大廈名都落埋！另外，佢有畫到西港島線既站既月台位置，當然冇入口位置啦，但西港島線都未扑鎚。
此外，西隧港島入口中環落橋萬里錯左好多年，呢本又繼續錯 ….
書後有幾頁深圳地圖，質素同同樣係萬里出果本深圳地圖一樣，冇要求既人可能會覺得OK，我就覺得比佢畫香港地圖既質素差好多啦，甚至比內地買到既幾蚊雞深圳地圖更差。
本野冇CD送，而家賣98蚊，但響聯合出版集團 (三聯、商務) 好似有八五折。
相關網址: http://www.wanlibk.com/cgi-bin/isbn_pages.asp?txtIsbn=9789621435910

四海文化既《2008香港終極地圖》響8月推出，雖然佢又叫「2008」又叫「終極地圖」，可惜佢只係根據地政總署2007年資料畫，好多興建中甚至2007年尾落成的都冇畫到，叫「2008」「終極」似乎有點名大於實。巴士線方面都算詳細，有深圳灣口岸既三條新巴士線，但可能因為地圖係響落馬洲支線通車前出版，所以冇落馬洲站果條新巴士線。呢本野要讚既係佢響頁邊用好sharp 既顏色分港九新界，顏色位置係唔同既，港島響頁邊最頂，九龍既響中間，新界響頁底；開益書店好似賣$98，應該係最平既販賣點之一。
相關網址: http://www.hkbookcity.com/showbook2.php?serial_no=114086

《2008地圖王》貫徹《地圖王》一貫既水準，佐敦谷公屋地盤有畫到，亦有落馬洲支線同深圳灣口岸，九龍站上蓋新既酒店佢都有畫到，八號幹線沙田段雖然只係畫左已通車果段仔 (佢其實畫得唔好) 但都算係咁 …. 原價$120，即係又加左價，開益八折賣$96。
(我搵唔到有《2008地圖王》介紹既網站，連壹傳媒既網站都冇)